Urtero bezala, Euskal Inauteria ospatu du Elgoibarko Ikastolak, baina aurtengo ekitaldia berezia izan da, gure herriak Kilometroak antolatzeko ardura daukalako aurten. Ohiko mozorro, kolore eta musikaz gain, herriko dultzaineroak eta erraldoiak batu dira Euskal Inauterietara.
Gainera, aitortza eta omenaldia egin nahi izan zaio Regina Arrieta Ikastolako musika irakasle izandakoari. 37 urte egin ditu Reginak Euskal Inauteria sustatzeko lanean, eta egindako lan eskerga aitortu nahi izan zaio. Euskal Inauteriei emandako bultzada eta oro har euskal kulturari egindako ekarpena eskertu nahi izan zitzaion. Hunkituta jaso zuen aitortza Regina Arrietak, eta talde-lanaren garrantzia azpimarratu zuen bere hitzartzean.
