Korrika ez ezik, soka saltoan ere egin dute Jose Gurrutxaga krosean
700 parte-hartzaile izan zituen Jose Gurrutxaga krosak. 30. ekitaldia izan zen igandekoa, baina inoizko bereziena ere izan zen, Kilometroak Elgoibarren egingo denaren aitzakiapean. Modu horretara, haur hezkuntzako ikasleek korrika egiteko aukera izan zuten, eta 0-5 urte arteko haurrentzat jolas-gunea antolatu zuten.
Behin lasterketa guztiak amaituta, bazkari herrikoia egin zuten elizpean, eta 250 lagunek parte hartu zuten. Bingo musikatua izan zuten bazkalostean.
Kilometroak dela eta, ekintza osagarriekin egin da aurtengo Pilota Eguna
Esan bezala, aurten herriko pilotaleku ezberdinetan egin da Pilota Eguna, baina finalak Kalegoen plazan jokatu ziren, jai-giro paregabean. Pilotan jokatzea gainera, pilota bera nola egiten den ikasteko tailerrean parte-hartzeko aukera izan zuten neska-mutikoek. Otero pilota-egileak irakatsi zien haurrei nola egiten diren pilotak.
Helduek ere izan zuten Pilota Egunean parte-hartzeko aukera. Behin finalak amaituta, barru pilota jolasean aritzeko modua izan zuten.
Regina Arrieta irakasleari aitortza egin zaio, Kilometroak dela eta aurten berezia izan den Euskal Inauterietan
Gainera, aitortza eta omenaldia egin nahi izan zaio Regina Arrieta Ikastolako musika irakasle izandakoari. 37 urte egin ditu Reginak Euskal Inauteria sustatzeko lanean, eta egindako lan eskerga aitortu nahi izan zaio. Euskal Inauteriei emandako bultzada eta oro har euskal kulturari egindako ekarpena eskertu nahi izan zitzaion. Hunkituta jaso zuen aitortza Regina Arrietak, eta talde-lanaren garrantzia azpimarratu zuen bere hitzartzean.
